傻‧小玲^O^@部落格

做麵包如果想隔天都又軟又好味的話, 用"種"法是必須~好似中種, 老種同湯種法...但以上3樣都要預先煮好, 甚至要放過夜, 所以對於無咁多時間既姊妹們同埋即慶想整包既就會有D煩惱~因為我之前跟D食譜係用湯種, 所以有時唔得閒煮就無心機整包啦~~

何謂水合法？

今次多得我個朋友仔教我整, 我先知道咩叫水合法~本身我地做普通麵包成份主要會有水, 麵粉, 酵母同牛油。如果用水合法, 我先開始先只落液體(奶/水/蛋)加粉搓成面團就靜止至少30分鐘, 再落埋其餘材料, 牛油等7分鐘之後再落, 就好似正常程序繼續~所以佢其實就係之前已經處理好個面團, 呢種方法應該係改變左面糰本身既化學作用, 令麵包更具彈性, 其實用普通吐司也可以用到, 等我下次又試下先~雖然頭個半小時要睇住個程序~但真係方便好多~~

好啦~講返今次試整既小餐包, 本身係叫流淚小餐包架..不過今次我無用流淚粉, 所以棉花小餐包好了~

棉花小餐包

材料:

高筋粉..........250g

蛋      ..........1隻

奶      ..........125g

糖      ..........35g

即溶酵母........3g

鹽      ...........3g

牛油   ...........35g

1. 先將高筋粉及牛奶,蛋加入麵包機, 開啟搓面麵模式, 留意住佢幾時搓成團即按取消停機休息至少30分鐘
2. 之後落晒其他材料, 將酵母投入格內, 再啟動搓麵糰模式開始, 牛油等7分鐘之後才加入
3. 麵糰模式會約在1小時後停機,這時已經完成第一次發酵變大兩倍, 聽到響聲就可以拎面糰出嚟排氣, 切割成9等分, 再滾圓靜待15分鐘
4. 將面糰造型,進行第二次發酵並放入正方焗盤約45-60分鐘
5. 入爐前撤上高粉, 放入170度焗爐焗18分鐘左右即成

可能我個焗盤得8吋太細啦~未發個陣都好迫啊~

第二法之後準備入焗爐啦~

深夜終於出爐啦~~ 真係好似出面買一樣咁鬆軟啊~~我同老公都忍唔住偷偷食左個~~第一次整都面包有拉絲的感覺啊~~好興奮啊~~

明天又有豐富既早餐啦~~好幸福哦~