傻‧小玲^O^@部落格

都有好一排無咩煮飯比老公食..因為唔夠精神~為了慳錢, 我都係開始做返煮飯婆先~~同埋始終出去食太多味精, 又油又無益..

今晚2餸一湯, 2個人已經食到好飽~~今次煮柱侯蘿蔔燜牛肋條..聽到個燜字大玄家可能都覺得好難~~只要大家努力D上網爬文~就無野難到架啦..不過我都要試左好多次先可以燜到又淋又香既牛肋條咋~~大家努力~~

呢樣餸我每次請人作客我都會煮, 好似好勁咁丫嗎~~特別鳴謝小CON 私房菜的BLOGGER~食譜參考http://siuconnie.blogspot.hk/2014/01/blog-post_2170.html

煮之前要準備D 材料餘下

柱侯蘿蔔燜牛肋條 (2-3人份量)

急凍牛肋條......一包 (我係惠康買, 趁佢特價即入貨, 通常50-60左右,佢背面係透明可以揀d半肥瘦架~ 因為唔識去街市買牛腩, 如果唔係應該更好)

白蘿蔔     .......一條

薑           ......四大片

蒜頭        ......2粒

八角        ......2粒 (通常可以去雜貨店買$5一包有幾隻)

冰糖        ......1小粒 (約5g)

蠔油        ......1湯匙

柱侯醬     ......3湯匙 (超市可以買到, 我用李錦記)

好啦~~準備好晒材料就可以開始啦~~

1. 將牛肋條切半, 通常我怕肥, 所以肥膏都會切左, 再放入預先煮好既滾水出水約2-3分鐘
2. 將出左水既牛肋條用凍水沖走d油脂, 備用
3. 預備爆料頭, 今次我用瓦煲, 下一茶匙油, 先落薑片,蒜頭及八角爆香, 再落3湯匙柱侯醬快炒(以免黏底)
4. 加入已出水既牛肋條炒勻, 下水蓋過牛肋條, 待水滾後收細火, 加入冰糖, 燜30分鐘
5. 燜完30分鐘後熄火, 焗30分鐘, 這時可以以滾刀方式切白蘿蔔並去皮
6. 之後再開細火將蘿蔔加入燜45分鐘待蘿蔔半透明
7. 最後加入蠔油, 蔥花即可上碟

建議要預2.5小時來預備這個菜式~~今次用瓦煲煮完就即刻上枱, d牛好似淋D好味D...大家都試下整啦~~成本大約$70左右啦~~2口子都食唔晒啊~~