傻‧小玲^O^@部落格

好濃郁的營養燉湯哦~~

我們家好喜歡飲湯的, 所以通常一星期都會煲至少一次~舊時返工個陣因為係一田買左個膳魔師真空煲~所以就算好夜先收工, 返到家都有湯飲...飲水真係好緊要架...

無湯水皮膚都乾d , 抵抗力又無咁好...為左健康既身體, 我通常都會煲d 有藥用價值既湯啊~~通常會係樓上燕窩莊同南北行買藥材啊~一包都用到好耐架啦~

自從係hsbc換左個le cruset 0.5ml 湯盅之後, 我宜家多左燉湯~雖然個盅細,一人一盅好方便, 仲可以食埋d料啊~ 燉出來會比較濃...但精華所在啊~~睇過d書...燉湯比較保存到食材的營養~但會較明火用多d時間~

如果你有時間或者有真空煲~~都可以試下~~咁我講下今次煲咩湯先...呢種湯我成日都煲, 不過燉就少d~因為老公氣管唔好, 鱷魚肉, 川貝, 無花果同百合呢d食材對氣管好好~所以我每隔幾星期就煲一次啦~宜家佢條氣管真係好d 啊~唔知係唔係真係有效呢~川貝飲落會甘味d...好貴啊~成$170一兩啊~~我買左二兩佢話可以煲三次~

材料 (2人份..)

鱷魚肉................2大塊 (剪細件)

川貝   ................3錢

陳皮   ................半塊 (預先浸軟)

百合  ................半兩(手拿一撮)

南北杏 ...............適量

無花果 ...............2粒

瘦肉    ...............$20左右

做法:

1)無花果洗淨切半

2)南北杏、百合清水浸一小時，洗淨備用

3)陳皮清水浸軟, 去襄備用

4)鱷魚肉洗淨切成細塊, 川貝洗淨

5)瘦肉切成小塊, 飛水備用 (要切到好似肉粒咁, 因為個盅細要留d 空位放多d水)

6)將以上材料放入燉盅內, 注入熱水至八份滿, 隔水大火燉2小時即成

將所有材料一分為二, 今次放太多啦..可以再少d啊~~如果唔係水會好少~

因為我無一個好深既煲, 所以我用左我個最大既真空煲, 再放過矮鐵架, 剛剛好放到2個盅~再注入凍水至湯盅既一半左右, 開大火煲2小時, 期間要蓋上煲蓋, 留意有無乾水, 我習慣煲定d熱水加入~咁樣就唔會減低煲內的溫度~這個原汁原味的燉湯就攪掂~適合任何天氣飲架~~我仲吃埋湯料~因為大部份營養會係湯料到架~同埋d瘦肉好淋架...